СКАЧАТЬ В ФОРМАТЕ PDF

Молитвы о путешествующих

Тропарь, глас 2: Путь и истина сый, Христе, спутника Ангела Твоего рабом Твоим ныне, якоже Товии иногда, посли сохраняюща, и невредимых, ко славе Твоей, от всякого зла во всяком благополучии соблюдающа, молитвами Богородицы, Едине Человеколюбче.

Кондак, глас 2: Луце и Клеопе во Еммаус спутешествовавый, Спасе, сшествуй и ныне рабом Твоим, путешествовати хотящим, от всякаго избавляя их злаго обстояния: вся бо Ты, яко Человеколюбец, можеши хотяй.

Молитва хотящему отыти в путь

Боже, Боже наш, истинный и живый путь, путешествовавый со слугою Своим Иосифом, спутешествуй, Владыко, и рабом Твоим (имярек), и всякаго обуревания и навета избави, и мир, и благомощие паки устрой: всякия правды промысл творяща по заветам Твоим, и исполнена житейских и небесных благ бывша, паки возвратитися благоволи. Яко Твое есть царство и сила и слава, Отца и Сына и Святаго Духа, ныне и присно и во веки веков. Аминь.

Молитва о путешествующих

Господи Исусе Христе Боже наш, истинный и живый путю, состранствовати мнимому Твоему отцу Иосифу и Пречистей Ти Деве Матери во Египет изволивый, и Луце и Клеопе во Еммаус спутешествовавый! И ныне смиренно молим Тя, Владыко Пресвятый, и рабом Твоим сим (имярек) Твоею благодатию спутешествуй. И, якоже рабу Твоему Товии, Ангела-хранителя и наставника посли, сохраняюща и избавляюща их от всякаго злаго обстояния видимых и невидимых врагов, и ко исполнению заповедей Твоих наставляюща, мирно же и благополучно, и здраво препровождающа, и паки цело и безмятежно возвращающа; и даждь им все благое свое намерение ко благоугождению Твоему благополучно во славу Твою исполнити. Твое бо есть, еже миловати и спасати нас, и Тебе славу возсылаем со Безначальным Твоим Отцем и со Пресвятым и Благим и Животворящим Твоим Духом, ныне и присно и во веки веков. Аминь.

Молитва первая ко Пресвятой Богородице

О Пресвятая Владычице моя, Дево Богородице, Одигитрие, покровительнице и упование спасения моего! Се в путь, мне предлежащий, ныне хощу отлучитися и на время сие вручаю Тебе, премилосердой Матери моей, душу и тело мое, вся умныя моя и вещественныя силы, всего себе вверяя в крепкое Твое смотрение и всесильную Твою помощь. О благая Спутнице и Защитнице моя! Усердно молю Тя, да не ползок путь мой сей будет, руководствуй мя на нем, и направи его, Всесвятая Одигитрие, якоже Сама веси, ко славе Сына Твоего, Господа моего Иисуса Христа, буди ми во всем помощнице, наипаче же в сем дальнем и многотрудном путешествии соблюди мя под державным покровом Твоим от всяких находящих бед и скорбей, от враг видимых и невидимых, и моли о мне, Госпоже моя, Сына Твоего Христа Бога нашего, да послет в помощь мне Ангела Своего мирна, верна наставника и хранителя, да якоже древле даровал есть рабу Своему Товии Рафаила, на всяком месте и во всякое время хранивша его в пути от всякаго зла: тако и мой путь благополучно управив и сохранив мя небесною силою, здрава да возвратит мя, мирна и всецела к жилищу моему во славу имени Своего Святаго, славяща и благословяща Его во вся дни живота моего и Тебе величающа ныне и присно, и во веки веков. Аминь.

 

Молитва вторая ко Пресвятой Богородице

О Пречудная и Превышшая всех тварей Царице Богородице, Небеснаго Царя Христа Бога нашего Мати, Пречистая Одигитрие Марие! Услыши нас грешных и недостойных в час сей молящихся и припадающих к Твоему Пречистому Образу со слезами и умиленно глаголющих: изведи нас от рова страстей, Владычице Преблагая, избави нас от всякия скорби и печали, огради от всякия напасти и злыя клеветы, и от неправеднаго и лютаго навета вражия. Можеши бо, о Благодатная Мати наша от всякаго зла сохранити люди Твоя и всяким благодеянием снабдити и спасти; разве Тебе иныя Предстательницы в бедах и обстояниях, и теплыя Ходатаицы о нас, грешных, не имамы. Умоли, Госпоже Пресвятая, Сына Твоего Христа Бога нашего, да удостоит нас Царствия Небеснаго; сего ради всегда славим Тя, яко Виновницу спасения нашего, и превозносим святое и великолепное имя Отца и Сына и Святаго Духа, в Троице славимого и поклоняемаго Бога, во веки веков. Аминь.

Молитва перед отправлением в плавание

Владыко Господи Иисусе Христе, Боже наш, вместе со святыми Своими учениками и апостолами плававший, бурный ветер утишивший и повелением Своим волны на море успокоивший! Сам, Господи, и нам сопутствуй в плавании, всякий бурный ветер утиши и будь Помощником и Заступником, ибо Ты Бог Благий и любящий человеков и Тебе славословие приносим, Отцу и Сыну и Святому Духу, ныне и присно и во веки веков. Аминь.

Молитва перед отправлением в воздушное путешествие

Господи Иисусе Христе, Боже наш, стихиям повелеваяй и вся горстию содержай, Егоже бездны трепещут и Емуже звезды присутствуют. Вся тварь Тебе служит, вся послушают, вся Тебе повинуются. Вся можеши: сего ради вся милуеши, Преблагий Господи. Тако и ныне убо, Владыко, рабов Твоих сих (имярек) моления теплыя приемля, благослови путь их и воздушное шествие, запрещая бурям же и ветром противным, и лодию воздушную целу и невредиму соблюдая. Спасительное и небурное по воздуху провождение им даруя и благое намерение совершившим им весело во здравии и в мире возвратитися изволь. Ты бо еси Спас и Избавитель и всех благих небесных и земных Податель и Тебе славу возсылаем со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь.

Псалом Давиду, прежде помазания, 26

Господь просвещение мое и Спаситель мой, кого убоюся? Господь Защититель живота моего, от кого устрашуся? Внегда приближатися на мя злобующым, еже снести плоти моя, оскорбляюшии мя, и врази мои, тии изнемогоша и падоша. Аще ополчится на мя полк, не убоится сердце мое; аще востанет на мя брань, на него аз уповаю. Едино просих от Господа, то взыщу: еже жити ми в дому Господни вся дни живота моего, зрети ми красоту Господню, и посещати храм святый Его. Яко скры мя в селении Своем в день зол моих, покры мя в тайне селения Своего, на камень вознесе мя. И ныне се вознесе главу мою, на враги моя: обыдох и пожрох в селении Его жертву хваления и воскликновения, пою и воспою Господеви. Услыши, Господи, глас мой, имже воззвах: помилуй мя и услыши мя. Тебе рече сердце мое, Господа взыщу. Взыска Тебе лице мое, лица Твоего, Господи, взыщу. Не отврати лица Твоего от мене, и не уклонися гневом от раба Твоего: помощник мой буди, не отрини мене, и не остави мене, Боже Спасителю мой. Яко отец мой и мати моя остависта мя, Господь же восприят мя. Законоположи ми, Господи, в пути Твоем и настави мя на стезю правую враг моих ради. Не предаждь мене в душы стужающих ми, яко восташа на мя свидетеле неправнднии и солга неправда себе. Верою видети благая Господня на земли живых. Потерпи Господа, мужайся, и да крепится сердце твое и потерпи Господа.

Псалом 90

Живый в помощи Вышняго, в крове Бога Небесного водворится. Речет Господеви: Заступник мой еси и Прибежище мое, Бог мой, и упаваю на Него. Яко Той избавит тя от сети ловчи, и от словесе мятежна плещма Своима осенит тя и под криле Его надеешися: оружием обыдет тя истина Его. Не убоишися от страха ночнаго, от стрелы летящия во дни, от вещи во тме преходящия, от сряща и беса полуденнога. Падет от страны твоея тысяща, и тма одесную тебе, к тебе же не приближится обаче очима твоима смотриши, и воздаяние грешников узриши. Яко Ты, Господи, упование мое, Вышняго положил еси прибежище твое. Не приидет к тебе зло и рана не приближется телеси твоему, яко Ангелом Своим заповесть о тебе; сохранити тя во всех путех твоих. На руках возьмут тя, да не когда преткнеши о камень ногу твою, на аспида и василиска наступиши и попереши льва и змия. Яко на Мя упова, и избавлю и: покрыю и, яко позна имя Мое. Воззовет ко Мне, и услышу его: с ним есмь в скорби, изму его, и прославлю его, долготою дней исполню его, и явлю ему спасение Мое.

Молитвы благодарственные

Благодарни суще недостойнии раби Твои, Господи, о Твоих великих благодеяниих на нас бывших, славяще Тя хвалим, благословим, благодарим, поем и величаем Твое благоутробие, и рабски любовию вопием Ти: Благодетелю Спасе наш, слава Тебе.

Молитва из благодaрственнаго молeбствия о получeнии прошeния

Господи Иисусе Христе Боже наш, Боже всякаго милосeрдия и щедрот, Егоже милоcть безмерна и человеколюбия неизследимая пучина! Ко Твоему величеству припaдающе со стрaхом и трeпетом, яко раби недостойнии, благодарeние Твоему благосeрдию и Твоих благодеяниих, на рабех Твоих бывших, ныне смирeнно приносяще, яко Господа, Владыку и Благодетеля слaвим, хвaлим, поeм и величaем, и припaдающе пaки благодарим, Твое безмерное и неизречeнное милосeрдие смирeнно моляще: да якоже ныне моления рабов Твоих прияти и милостивно исполнити сподобил еси, и во предняя в Твоeй и искренняго любви и во всех добродетелех преспевaющих, Твоя благодеяния всех верных твоих получити, Церковь Твою святую и грaд сeй [или вeсь сию, или обитель сию] от всякаго злaго обстояния избавляя и мир и безмятeжие тем дaруя, Тебе со Безначaльным Твоим Отцeм, и Пресвятым и Благим и Единосyщным Твоим Духом, во едином существе слaвимому Богу, всегда благодарeние приносити и преблагая глаголати и воспети сподобиши.

И абие велеглaснейше возглашaет:

Слaва Тебе Богу, Благодaтелю нaшему, во веки веков.

Молитва Богородице благодaрственная

Что Ти принесeм, или что Ти воздадим, о Премилоcтивая Госпоже Владычице, Застyпнице рода христиaнскаго, за вся Твоя неисчетная благодеяния, яже присно являеши всем призывaющим имя Твое и Твоея помощи просящим; Кто бо притекaяй к Тебе посрaмлен и неуслышан от Тебе отходит, о Премилосeрдая Мати; Вемы, Пречистая, яко, за множество грехов и беззаконий нaших, несмы достойни ниже имя Твое преслaдкое нарещи, не точию песнопения от осквернeнных устeн Тебе приносити, и удобее есть нaм молчaние любити. Но да не явимся непaмятливи и неблагодaрни пред Тобою, дерзaем приносити Тебе сие коленопреклонeнное славословие: Ты же, Премилосeрдая Мати, не возгнушaйся прияти е, яко от избытка любящих Тя сердeц возносимое. Сама Ты, Владычице, благодaтию Твоeю коснися сердeц нaших, да яко воск растаявша пролиются пред Тобою в слeзных благодарeниих и славословиих. Благодарим Тя, Всепетая: не таим благодеяний Твоих, но велеглaсно возвещaем, да вси слышащии притекaют к Тебе, единей непостыдней Застyпнице рода христиaнскаго, и да немолчно славословят Тя, Всепетую, во веки веков.

ПОМЯННИК

Помяни, Господи Иисусе Христе Боже наш, милости и щедроты Твоя от века сущыя, ихже ради и вочеловечился еси, и распятие и смерть спасения ради право в Тя верующих претерпети изволил еси: и воскрес из мертвых, вознеслся еси на Небеса, и седиши одесную Бога Отца и призираеши на смиренные мольбы всем сердцем призывающих Тя. Приклони ухо Твое и услыши смиренное моление мене, непотребнаго раба Твоего, в воню благоухания духовнаго Тебе за все люди Твоя приносящаго. И в первых помяни Церковь Твою Святую, соборную и Апостольскую, Юже снабдел еси Честною Твоею Кровию, и утверди, укрепи и разшири, умножи, умири, и непреобориму адовыми враты во веки сохрани: раздирания церквей утиши, шатания языческая угаси, и ересей востания скоро разори и искорени, и в ничтоже силою Святаго Твоего Духа обрати. [Поклон]

Спаси, Господи, и помилуй богохранимую страну нашу, власти и воинство ея: и глаголи мирная и благая в сердцах их о Церкви Твоей Святей и о всех людех Твоих, да и мы в тишине их тихое и безмолвное житие поживем во правоверии, и во всяком благочестии и честности. [Поклон]

Спаси, Господи, и помилуй великаго господина и отца нашего Кирилла, Святейшаго Патриарха Московскаго и всея Руси, и Святейшия Вселенския Патриархи и Преосвященныя митрополиты, архиепископы и епископы православныя, иереи же и диаконы и весь причет церковный, яже поставил еси пасти словесное Твое стадо: и молитвами их помилуй и спаси мя, грешнаго. [Поклон]

Спаси, Господи, и помилуй отца моего духовнаго имярек, и святыми его молитвами прости моя согрешения. [Поклон]

Спаси, Господи, и помилуй родители моя имярек, и рабы Твоя имярек и вся сродники моя по плоти, и ближния рода моего, и други и даруй им мирная Твоя и премирная благая. [Поклон]

Спаси, Господи, и помилуй во Святогорских монастырех и в Российских, и во инех местех живущия и пребывающия отцы и братию нашу, и сестры, и молитвами их помилуй и мене, грешнаго. [Поклон]

Спаси, Господи, и помилуй по множеству щедрот Твоих вся священноиноки, иноки же и инокини, и вся в девстве же, и благоговении и постничестве живущия в монастырех, в пустынях, в пещерах, горах, столпех, затворех, разселинах каменных, островех же морских, и всяком месте владычествия Твоего правоверно живущия, и благочестно служащия Ти, и молящиися Тебе: облегчи им тяготу, и утеши их скорбь, и к подвигу от Тебе силу и крепость им подаждь, и молитвами их даруй ми оставление грехов. [Поклон]

Спаси, Господи, и помилуй старцы и юныя, нищыя и сироты и вдовицы, и сущия в болезни и в печалех, в бедах же и скорбех, обстояниих и пленениих, в темницах же и заточениих, изряднее же в гонениих Тебе ради и веры Православныя, от язык, безбожных, от отступников и от еретиков, сущия рабы Твоя: и помяни я, посети, укрепи, утеши, и вскоре силою Твоею ослабу, свободу и избаву им подаждь. [Поклон]

Спаси, Господи, и помилуй благотворящия нам, милующия и питающия нас, давшыя нам милостыню и заповедавшыя нам недостойным молитися о них, и упокоевающия нас: и сотвори милость Твою с ними, даруя им вся, яже ко спасению прошения, и вечных благ восприятия. [Поклон]

Спаси, Господи, и помилуй посланныя в службу и путешествующия отцы и братию нашу и сестры, и вся православныя христианы. [Поклон]

Спаси, Господи, и помилуй ихже аз безумием моим соблазних, и от пути спасительнаго отвратих, к делом злым и неподобным приведох: Божественным Твоим промыслом к пути спасения паки возврати. [Поклон]

Спаси, Господи, и помилуй ненавидящия и обидящия мя, и творящия ми пакости, и не остави их погибнути мене ради, грешнаго. [Поклон]

Отступившия от православныя веры и погибельными ересьми ослепленныя, светом Твоего познания просвети, и Святей Твоей Апостольстей соборней Церкви причти. [Поклон]

Правоверие утверди, и воздвигни рог христианский, и низпосли на нас милости Твоя богатыя. [Поклон]

Об усопших:

Помяни, Господи, от жития сего отшедшыя правоверныя цари и царицы, благоверныя князи и княгини, Святейшия Патриархи, Преосвященныя митрополиты, архиепископы и епископы православныя, во иерейском же и в причте церковном и иночестем чине Тебе послужившыя, и блаженныя ктиторы церковныя, и в вечных Твоих селениих со святыми упокой. [Поклон]

Помяни, Господи, души усопшых рабов Твоих имярек, и всех сродников моих по плоти и ближних и знаемых: и прости их вся согрешения вольная и невольная, даруя им Царствие и причастие вечных Твоих благих, и Твоея безконечныя и блаженныя жизни наслаждение. [Поклон]

Помяни, Господи, и вся в надежди воскресения и жизни Вечныя усопшыя отцы и братию нашу, и сестры, и зде лежащия и повсюду, православныя христианы: и со святыми Твоими, идеже присещает свет лица Твоего, всели, и нас помилуй, яко Благ и Человеколюбец, аминь.

 

На конец же глаголем сие трижды:

Подаждь, Господи, оставление грехов всем прежде отшедшым в вере и надежди Воскресения отцем, братиям и сестрам нашым, и сотвори им вечную память.

 

Господи, помилуй [трижды]